Posted by: Mermaid | October 7, 2007

أنا عيلّة

أف أف أف … زهقف من كوني كبيرة، زهقت من تصرفات وعُقد الكبار. عايزة أرجع عيلّة تاني. مش عايزة أخد بالي من تصرفاتي لما أفرح أو أغضب. عايزة لما أفرح اتنطط واسقف بإديا، ولما أغضب اترمي عالأرض واعيط واخبط بإيديا ورجليا. مش عايزة أخد مرتب كبير بيخلص في يوم 15 في الشهر. عايزة 2 جنيه و75 قرش أشتري بيهم الشيكولاتة والعصير اللي باحبهم، و 2 جنيه ونص عشان أشتري ميكي. مش عايزة اتغدى في مطعم إيطالي أو صيني، عايزة آكل عالبحر أو وأنا باتفرج على فيلم كرتون باحبه. مش عايزة ألبس بدلة شيك عشان عندي إجتماعات مهمة مع عملاء. عايزة ألبس جيبة لموني على الركبة وتيشيرت قطن أبيض مرسوم عليه زرافة مندهشة حواليها تلات علامات تعجب. مش عايزة ألبس كعب عالي، باكره جزم الكبار! عايزة ألبس صندل أبيض بكعب سنتيمتر واحد مشغول عليه وردة دهبي. مش عايزة آكل رز وخضار ولحمة. عايزة شيكولاتة وأيس كريم وعصير … كلهم مرة واحدة. مش عايزة أسوق عربية. عايزة أفرد نفسي على الآخر على الكنبة اللي ورا وأنام أو أخرج راسي من الشباك واتفرج عالدنيا. مش عايزة اتظاهر بالابتسام في عز ما أنا عايزة أنفجر في العياط. عايزة أضحك من قلبي لما أكون فرحانة وآخد ركن على جنب وأعيط لما أكون زعلانة. عايزة أكون أنا … وأنا عيلة!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

%d bloggers like this: