Posted by: Mermaid | November 10, 2007

قعدة وكتاب ومكرونة حلوة

بقالي كتير مقعدتش مع أمي. كنت مشغولة عنها باللي بيحصل حواليا، وأكتر، باللي بيحصل جوايا. انهاردة حسيت إني عايزة أقعد معاها … مش لازم نتكلم … بس أكون جنبها. هي أكتر واحدة بأحس بالأمان وأنا معاها حتى لو مش في حضنها. المهم، جبت الحاسب المحمول (الإسم غريب قوي بالعربي!) ورواية “نقطة النور” لبهاء طاهر وقعدت جنبها على السرير. قعدت أنكش فيها شوية الأول وضحكنا من قلبنا … حاجة ماعملتهاش بقالي فترة. فكرتني بالأدوية بتاعتي اللي لازم أخدها لقدمي المصابة. وأنا باخُد الدوا جت عينيا على عنوان في الجرنال اللي كانت بتقراه. “والدة بريتني سبيرز تؤلف كتاب عن إبنتها”. ضحكت في نفسي وقلت: “مين ده اللي ممكن يشتري كتاب عن بريتني سبيرز!” إفتكرت ساعتها اني إشتريت كتاب عن مصطفى قمر وأنا عندي 14 سنة. حاجة باحاول أعلمها لنفسي الأيام ديه وهي إني مانتقدش سلوك إلا لما أفكر الأول أنا باعمله ولا لأ. 

“المكرونة الحلوة جت.” قالتها أمي وهي بتديني طبق فيه حتة مكرونة حلوة كبيرة. المكرونة الحلوة ديه مش معناها مكرونة لذيذة، لأ لأ … معناها مكرونة مسكرة. صنف حلويات يعني. وأمي أحسن واحدة في الدنيا ممكن تعمل المكرونة ديه :). باحب الحاجة وهي لسه طازة وطالعة من الفرن كده. كانت المكرونة سخنة (بس مش قوي قوي يعني) … وسايحة شوية. سكرها كان أكتر سِنة من درجة الحلاوة اللي باحبها … بس افترست حتة المكرونة لآخر فتفوتة. 

فتحت الحاسب المحمول وبعدين قفلته تاني لأني حسيت إني مش عايزة أشتغل. فتحت “نقطة النور” وبدأت أقرا. قبل ما أحس لقيت نفسي خلصت سبعين صفحة منها! بقالي أكتر من سنة ونص وأنا معدل القراءة بتاعي بطئ جداً. لكن في الشهر اللي فات بقيت أقرا كتير وبسرعة. أنا سعيدة :) أنا سعيدة كمان لأن تقريباً في يوم واحد جالي كتابين هدية: “نقطة النور” من رحاب، و “Veronica Decides to Die” من صديقي محمد الحاجري :) أجمل هدية ممكن تجيلي هي الكتب. فكرت في أجمل هدية جتلي قبل كده لكن بعدت الموضوع بسرعة عن تفكيري وقلت لنفسي: “ايوه، ايوه…الكتب!”ِ


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

%d bloggers like this: