Posted by: Mermaid | February 10, 2011

كمان ساعة

الثلاثاء، 1 فبراير.. خطاب الرئيس مبارك. تحول كبير في الآراء. الناس انقسمت. البعض كان مصمم على تنحي الرئيس وإسقاط النظام بالكامل. والبعضكان مع إن الرئيس يكمل مدة رئاسته مع عمل كل التغييرات التانية اللي الشعب طالب بيها.أ

الأربعاء، 2 فبراير.. المظاهرات اللي بتتطالب بتنحي الرئيس مستمرة في ميدان التحرير. طلعت مظاهرات أخرى كبيرة عند جامع مصطفى محمود مؤيدة للرئيس. على بعد الظهر، جزء المظاهرات المؤيدة بدأت تتحرك إلى ميدان التحرير. جمال وأحصنة وبلطجية بيهاجموا المتظاهرين المعارضين. ناس ماتت وحوالي ألف أصيبوا. كانت مجزرة!أ

أنا بدأت يوم 25 يناير وأنا عايزة مبارك يمشي. وقبل الخطاب بيوم إبتديت أغير رأيي وأقول ندي الحكومة الجديدة فرصة ونشوف. حصل إنقسام بين الناس. الناس اللي ضد المظاهرات المعارضة بتقول على الناس اللي في التحرير إنهم هايخربوا البلد وإنهم إخوان ومندسين وخونة للبلد. والناس المؤيدين لمظاهرات التحرير شايفين إن الناس اللي ضد المظاهرات أغبية ومش فاهمين وخونة للمظاهرة. بعد مجزرة التحرير أنا كنت عايزة الناس اللي في التحرير ترجع بيوتها لأني كنت مرعوبة من كمية الدم اللي هناك. كنت عايزة الناس تروح بس يوم الأربع، تلم صفوفها وترجع تاني تتطالب باللي هي عايزاه. وعند النقطة ديه مابقتش عارفة إيه رأيي بالظبط بالنسبة للمظاهرات. ماكنتش عارفة هل لو مبارك تنحى دلوقتي ده هايفيد بحاجة؟ هل هو لسه في إيده أي سلطة؟ هل لو قعد هايلم قوته تاني ويعمل قمع تاني ولا الثورة قوية جدًا لدرجة إن مافيش حاجة ممكن تكسرها؟ كنت باحاول أتكلم مع الناس اللي مع المظاهرات عشان أفهم إيه هي الأهداف دلوقتي. بس برضه ده ما أقنعنيش كفاية. قراية المقالات الكتيييييرة قوي على غرار “لو لسة محتار إقرا” في محاولة “لتنوير” (أو بنبرة أهدى) لإقناع اللي مش مع المظاهرات برضه ما أقنعنيش. ممكن يكون العاملين دول خلوني أبقي أقرب للمظاهرات لكن مش كليًا. رحت ميدان التحرير يوم 8 فبراير مش عشان أشوف الناس لأني كنت عارفة هم قد إيه بيحبوا مصر وقلبهم عليها. مش عارفة أنا رحت ليه بالظبط بس كنت حاسة إني لازم أكون في الميدان وأبقى جزء من الناس… فقط جزء منهم. بس وجودي هناك ماخلانيش برضه أقتنع بالمظاهرات 100%. اللي أقنعني إن مبارك والنظام كله لازم يتنحى هو اللي شفته على مدار الأيام اللي فاتت من كشف لملفات الفساد في البلاد! كل ديه فلوس منهوبة؟!!! كل ديه مليارات مسروقة وفيه ناس مش لاقية تاكل ولا تتعالج ولا مكان محترم تعيش وتتجوز فيه؟!!! بجانب ده، نائب الرئيس كان عمال يدلي بتصريحات غريبة وتنم عن غباء سياسي إن الموجودين في ميدان التحرير إخوان وعملاء وناس بأجندات و”بعض” شباب 25 يناير! كنت عايزة أقوله: “تاااااني؟!!! إنتوا مابتتعلموش أبدًا؟!” فاقتنعت ساعتها إن النظام ماتغيريش وفعلاً لازم يسقط. دلوقتي أنا عايزة مبارك يمشي. وعايزة سليمان يمشي كمان بس عارفة إن ده صعب في المرحلة ديه. شفيق حاسة إنه واعد – لما نشوف!أ

انهاردة 10 فبراير.. الساعة 9 مساءًا. مبارك هايلقي بيان للأمة كمان ساعة. هايتنحى؟ هاينقل سلطاته لسليمان؟ يا رب كمل الأمور على خير وسلم. يا رب ولّي أمورنا خيرنا.أ


Responses

  1. خلااااااااااااااااااص

    مبارك تنحى!!! كنت امبارح بعد خطابه محبطة…زي ما المصريين محبطين!! و كنت خايفة على مصر …كتير

    دلوقتي ملايين الناس بتبكي بحرقة و حرارة..مش بس في مصر…هون كمان..و بكل العالم العربي
    تخرج مسيرات تملؤها الدموع الفرحة ..في اماكن كثيرة في الوطن العربي يشاركون المصريين فرحتهم!!

    شكرا لكم..لانكم احييتمونا من جديد..و الشكر موصول لتونس طبعا..ربنا يفرحكم كمان و كمان…و يحفظ مصر..و تبنوها و تشوفوها زي ما انتوا بتحلموا بيها

    امين!!

  2. ياااااا عروبة

    :))))))))))

    أنا مش مصدقة… مش مصدقة إني عشت وشفت اليوم ده… أنا فرحانة وقلقانة وخايفة ومتفائلة… كل حاجة كل حاجة حاسة بيها دلوقتي.

    شكرً على دعواتكم ودعمكم… الناس كلها كانت معانا… وأنا باتكلم على الشعوب مش الحكومات اللي بيبقى ليها حسابات تانية

    يا رب مصر … إن شاء الله هاتبقى أحلى وأقوى

    يا رب عقبال كل ما الشعوب العربية والغير عربية تتحرر… يا رب عقبال المسجد الأقصى


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

%d bloggers like this: