Posted by: Mermaid | April 26, 2016

أنا مش عايزة أتجوز!

العنوان اقتباس من ماما واللي قالتهولي من كام سنة لما سمعت عن كتاب “عايزة أتجوز” بتاع غادة عبد العال. ساعتها ماما قالتلي بهزار: المفروض يا ميادة تكتبي كتاب “أنا مش عايزة أتجوز”. ماما قالتلي كده لأني باشوف ناس كتير وعادة المواضيع مش بتمشي لأن حد فينا مش بيعجب التاني. حصل كام موقف مؤخرًا خلوني أقرر أكتب التدوينة دي عن الحاجات اللي بتقفلني من أي راجل، وأعتقد إنها بتقفل بنات كتير تانين. الحاجات اللي هاذكرها بالأسفل هي حاجات حصلت بالفعل فا بلاش حد يفكر إنها تهيؤات:ا

لما حد يبدأ يستخدم أسماء دلع زي: “حبيبتي وهاني” بعد يومين من بداية الكلام، ده نسميه إيه؟!!!ا

لو أنت مدخن، لما تكون مع حد من الذوق أنك تستأذن قبل كل سيجارة. ولو عرفت إن اللي معاك بتعاني من حساسية من الدخان وأصريت إنك تدخن يبقى حضرتك محتاج تتفطم الأول قبل ماتخرج مع ناس وتتعبهم وتجيب لهم الضغط!ا

ماينفعش تقول لواحدة: “إنتي ليه مش ماشية مع القطيع؟” فقط لأن آرائها مختلفة عن بقية الناس. مش لازم الواحدة تبقى معزة عشان تعجب حضرتك!ا

لما يتقالك: “لو أنت بتدخن فا مش من حقك تقول لمراتك ماتدخنش” بلاش تنتفخ أوداجك وودانك تبدأ تطلع دخان وتقول بصوت هادر: “دا أنا أدفن نفسي لو مراتي دخنت حتى لو أنا بادخن.” إهدى كده واسمع نفسك بتردد الكلام الغير عقلاني ده!ا

مش المفروض تستقبل مكالمات وإنت في خروجة مع بنت (ديت). لكن لو حاجة مهمة قوي، ممكن تستأذن بلطف إنك تاخد المكالمة.ا

لما تقول: “أنا أصلا واحد مميز وأي حد يتمناني” حاول تدارى بسرعة في أي حتة قبل ما الشاكوش ينزل على دماغك!ا

لو إنت مش معاك عربية، ماينفعش تطلب من بنت تسوق قرب الساعة عشان تعدي عليك عشان تخرجوا! أو إنك تطلب منها إنكم تخرجوا جنب بيتك / شغلك عشان حضرتك مش قادر تهز طولك وتاخد تاكسي! المفروض الراجل هو اللي يتعب ويريح البنت ويروح لها في أقرب حتة ليها مش العكس!ا

دي نبذة مختصرة جدًا من اللي الواحد بيشوفه. الحمد لله على نعمة العقل اللي ماخلتنيش أتنازل وأتجوز حد من أنصاف الرجال اللي باقابلهم!ا


Responses

  1. السلام عليكم :

    رمضان كريم..كل سنة و انت طيبة..و أنت الى الله أقرب

    يتعاد عليكم بالخير و البركة و راحة القلب و البال.

  2. يا عروبة، كل سنة وإنتي طيبة وبخير وبصحة وسعادة :) ربنا يتقبل الصيام والقيام ويجعله عيد سعيد عليكم :)

    باعتذر بشدة على الرد المتأخر!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

%d bloggers like this: